Ramazan ayından istifadə etmək üçün qadınlara yönəlik nəsihət:

Mən hesab edirəm ki, məscidlərin xətibləri (imamları) müsəlmanları bu seriallar və tamaşalardan çəkindirməlidirlər, xüsusilə də Ramazan ayında (gündüzlərində) yayımlananlar haqqında danışmalıdırlar. Məsələn, filan serial, filan tamaşa – çünki bəzi insanlar deyirlər ki, bəzi seriallar ciddi mövzulara toxunur və faydalıdır. Ancaq belə olsa belə, Ramazan bu kimi şeylərdən daha dəyərlidir və vaxtınızı boş yerə sərf etməyə dəyməz. Əgər bu seriallar və tamaşalar mənasız və səviyyəsiz olarsa, vəziyyət daha da pis olar. Buna görə də məscid xətibləri insanları bu məsələdə xəbərdar etməli və Ramazan ayı üçün xüsusi hazırlanmış bu proqramlardan çəkindirməlidirlər. Çünki şeytan onları bu iş üçün səfərbər etmişdir. Son illərdə ortaya çıxan televiziya kanalları və internet bu təhlükəni daha da artırmışdır. Buna görə də məscid xətiblərinin insanlara bu mövzuda xəbərdarlıq etmək kimi böyük bir məsuliyyəti vardır.

Qadınlar Ramazan ayında, eləcə də digər vaxtlarda Allahdan qorxmalıdırlar. Lakin xüsusilə Ramazan ayında məscidlərə gedərkən hicaba riayət etməli, bəzənməməli, ətirlərdən istifadə etməməli, yollarda, ictimai yerlərdə və qapıların önündə kişilərlə qarışmamalıdırlar. Çünki qadın məscidə ibadət üçün çıxır və onun əsas məqsədi zinət, təmtəraq, gözəllik nümayiş etdirmək, başqaları ilə müqayisə aparmaq və başqaları haqqında danışmaq olmamalıdır. Qadınlar bu işlərdən çəkinməli və ibadətə yönəlməlidirlər.

Peyğəmbərimiz (sallallahu əleyhi və səlləm) buyurmuşdur:

“Allahın kənizlərini (qadın qullarını) Allahın məscidlərindən məhrum etməyin” və onlar sadə şəkildə, bəzənmədən, ətirlənmədən və örtülü halda çıxmalıdırlar.

Şeyx Saleh Fovzanın rəsmi saytından