➡️[ İbrətli hekayə ]

Kufədə üzü çox gözəl, ibadət və çalışqanlıqda çox ciddi olan bir gənc vardı. O, Nəxə qəbiləsindən olan bir tayfanın himayəsində qaldı. Onların arasında gözəl bir cariyəni gördü və ona vuruldu; eşqi ağlını başından aldı. Cariyənin də halı onun kimi oldu. Gənc onun atasına elçi göndərib qızı istədi. Atası isə xəbər verdi ki, qız əmisi oğluna nişanlıdır.

Onların çəkdiyi eşq ağrısı şiddətlənəndə cariyə gəncə xəbər göndərdi:

“Bilirəm ki, mənə olan məhəbbətin çox güclüdür, mənim də sınağım səninlə ağırlaşıb. İstəsən səni ziyarət edim, istəsən sənə evimə gəlməyi asanlaşdıraq.”

Gənc elçiyə dedi:

“Bu iki yoldan heç biri olmaz. 

قُلۡ إِنِّيٓ أَخَافُ إِنۡ عَصَيۡتُ رَبِّي عَذَابَ يَوۡمٍ عَظِيمٖ

‘De: Əgər Rəbbimə asi olsam, böyük günün əzabından qorxuram.’ 

Mən elə bir oddan qorxuram ki, onun közəri heç sönməz, alovu heç səngiməz.”

Elçi bu sözləri cariyəyə çatdıranda o dedi:

“Deməli, o bütün bunlara baxmayaraq Allahdan qorxur. Allaha and olsun, buna ən layiq olan da elə budur. Qullar bu qorxuda hamısı ortaqdır.”

Bundan sonra o, dünyadan üz döndərdi, bütün dünya bağlarını arxasında qoydu və ibadətə başladı. Bununla belə, gəncə olan sevgisi və həsrəti onu əritdi, zəiflətdi və nəhayət, bu haldan vəfat etdi.

Gənc isə onun qəbrinə gələr, ağlayar və onun üçün dua edərdi. Günlərin birində qəbri başında yuxuya getdi və onu yuxuda ən gözəl halda gördü. 

Dedi:

“Necəsən? Məndən sonra nə ilə qarşılaşdın?”

Qız dedi:

“Necə də gözəldir, ey arzum, sizə olan sevgi,

Xeyir və yaxşılığa aparan bir sevgidir bu sevgi.”

Gənc dedi:

“Bununla hara çatdın?”

Qız dedi:

“Bitməyən bir nemətə, tükənməz bir həyata —

Əbədiyyət cənnətində, faniliyi olmayan bir səltənətə.”

Gənc dedi:

“Orada məni xatırla, çünki mən səni unutmuram.”

Qız dedi:

“Allaha and olsun, mən də səni unutmuram. Hətta mənim Rəbbimdən və sənin Rəbbindən xahiş etdim ki, bizi bir yerdə cəmləsin. Buna görə də sən də çalışqan ol, ibadətdə səylə davam et.”

Gənc dedi:

“Səni nə vaxt görəcəyəm?”

Qız dedi:

“Çox keçməz, yanımıza gələcəksən və bizi görəcəksən.”

Bu yuxudan sonra gənc cəmi yeddi gecə yaşadı və sonra vəfat etdi. Allah ona rəhmət etsin.

📚İbn Qeyyim | Rovdatul Muhibbin