Siz Onun üçün daha çox darıxmalısınız

Şeyx Abdullah ibn AbdurRahim Əl-Buxari (Allah onu qorusun) belə deyir:

İmam Buxari öz səhihində Cabirdən (Allah ondan razı olsun) belə rəvayət edir:

Allah Rasulu ﷺ Cümə günü bir ağacın və ya xurma kötüyünün üzərinə çıxıb xütbə verərdi. Ənsarlardan olan bir qadın və ya bir kişi dedi:

Ey Allahın Rasulu, bəlkə sənin üçün bir minbər düzəldək?

Allah Rasulu ﷺ buyurdu:

Əgər istəyirsinizsə, düzəldin. Beləliklə ona bir minbər düzəltdilər. Cümə günü gəldiyi zaman Allah Rasulu ﷺ minbərə çıxarıldı. Bu zaman kötük balaca uşaq kimi hönkürtü ilə ağlamağa başladı. Sonra Allah Rasulu ﷺ minbərdən düşüb kötüyü qucaqladı. Kötük isə sakitləşdirilən uşaq kimi yavaşca inildəyirdi.

Allah Rasulu ﷺ belə buyurdu:

O, (kötük) yanında edilən Allahın zikri üçün darıxıb ağlayırdı.

Buxari, 3584

Buna görə də imam Həsən Əl-Bəsri bu hədisi rəvayət etdikdə ağlayar və belə deyərdi:

Ey müsəlman toplumu, kötük Allah Rasulu ﷺ üçün darıxdığına görə inildəyirdi. Siz Allah Rasulu ﷺ üçün daha çox darıxmalısınız.

Siyər, 4/570

"Sələfilik nədir?" adlı risalədən, səh. 7, 8, 9

Hazırladı: Samiq Mustafayev